FAAMATALAGA SAUNIUNI: FAAMATALAGA MO TAGATA FAIGALUEGA

ISBN: 978-0-478-33338-1

AFIO MAI!

Afio mai i le RSE i Niu Sila.

O le RSE o le Recognised Seasonal Employer (Pule o Galuega Faavaitaimi ua Aloa‘ia). O le tagata e ana le galuega lea ua taliaina e le Malo o Niu Sila, lona faafaigaluega mai o tagata mai fafo atu o le atunuu.

O le ‘au totö fualaau ‘aina ma fualaau taumafa mata i Niu Sila nei o loo moomia nisi tagata faigaluega i nisi o vaitaimi e fesoasoani i faatoaga. O le a e faigaluega i le vaega o fualaau taumafa mata ma fualaau ‘aina poo le vaega e gaosi ai le uaina.

O nei faamatalaga e fesoasoani ia te oe i le faaaogäina tatau o lou taimi i Niu Sila. O lou pule atoa ai ma le Matagaluega o Leipa o le a tele ni faamatalaga e ia i latou e fesoasoani ai ia te oe i lou faigaluega ai ma lou aumau ai foi i Niu Sila.

O se avanoa lelei ae pule lava oe pe faaaogä. Matou te faamanuia atu.

O le vaega a le RSE i Niu Sila

TUPE

LOU TOTOGI

O lau tupe o le a alu i le tusitupe o le a saunia e lou pule mo oe. O le a e maua se pepa totogi e ta‘u atu ai ia te oe le aofai o le tupe ua totogi atu, pe faapefea ona totogi oe, atoa ai ma nisi o mea o loo toese mai.

O le avea ai o oe ma tagata faigaluega faavaitaimi, o le a totogi oe i se tasi o auala nei e tolu:

1. Totogi Itula
Afai e ta‘ua mai i lau konekarate o oe e totogi itula, o lona uiga o le a totogi atu lava ia te oe se aofaiga mo itula uma o loo e faigaluega ai.

Faataitaiga: Afai e te faigaluega i le 30 itula ae o lou totogi itula e $12 tala Niu Sila, o le a totogi atu ia te oe le $360 tala Niu Sila A O LE‘I aveesea lau lafoga ma nisi mea e toese mai i lou totogi. O le Lafoga ma isi tupe e toesea o le a faaitiitia ai lou totogi.

2. Totogi Vaega
O le totogi vaega o lona uiga o le a totogi atu se vaega tupe ia te oe i taimi taitasi e mäe‘a ai ona e faatinoina se galuega. Faataitaiga i le galuega tau apu, e mafai ona totogi oe i se vaega tupe ua faatulagaina mo paelo taitasi e te faatumuina i apu. O lona uiga o le vave o lau galue, o le tele foi lea o lou totogi.

Faataitaiga: afai e totogi oe i le $30 tala Niu Sila mo paelo taitasi o apu e mafai ona e faatumuina, afai e tutumu au paelo e 15 i le faai‘uga o le vaiaso, o le a totogi oe i le $450 tala Niu Sila ae lei toesea le lafoga ma isi tupe tipi mai lou totogi. O le tele o paelo e faatutumu, o le lelei foi lea.

3. Tuufaatasiga
I nisi mataupu e ono suia lou totogi. E mafai ona tulai mai lea tulaga pe afai o le a suia le ituaiga galuega e te faatinoina. Faataitaiga, i isi taimi e te fou atu ai i se galuega e te amata ai i se totogi itula ma toe suia mulimuli ane i se totogi vaega pe a maua le malamalamaga ma amata foi ona vave
lau galue.

E ono ese lou totogi mai isi tagata o loo tou faigaluega faatasi pe afai e ese le galuega o loo
e faia.

TOTOGI MO ASO MÄLÖLÖ

E mafai ona avanoa oe i se totogi faaletausaga mo aso mälölö i le faatatau e 8% o lou totogi atoa a o lei aveesea le lafoga. O nisi fale faigaluega e aofia ai le totogi mo aso mälölö i le totogi o vaiaso taitasi ae o isi fale faigaluega e totogi ane ia te oe le totogi o aso mälölö i le faaiuga o lau galuega.

E tatau ona faamautu o loo lava le tupe ia te oe pe a e taunuu i Niu Sila e totogi ai mea e manaomia a o talitali lou uluai totogi.

Afai e iai ni mataupu o e fia talanoaina e faatatau i lou pepa totogi, faafesootai le taitai o le tou vaega poo lë o loo e faigaluega ai.

TUPE TOESE MAI LOU TOTOGI

O le aofaiga o loo e galue ai e lë o le aofai lea o le a e maua uma ona e iai nisi mea e toesea. E ui e te lë maua le tupe lea i lou lima, a o tupe nei e toesea e fesoasoani i lou galue ai ma aumau i Niu Sila, aemaise o nisi o auaunaga o le a mafai ona e maua.

Lafoga
O le lafoga poo le PAYE e ao lava ona toesea mai soo se tagata. O le lafoga o le tupe mai lou totogi e alu aga‘i i le malo o Niu Sila. O tagata uma e faigaluega i Niu Sila e totogi lafoga. E mafai ona ta‘u atu e lau pule ia te oe le aofai o lau lafoga e tatau ona toesea mai lou totogi. E mafai foi ona e iloa i lou pepa totogi.

Tupe Ofo E Toesea
O toesega nei e fai i le loto malie ma e faato‘ä mafai ona faia pe a e malie i ai ma faailoa i se tusi e te tusia. O le faatagaina o lou pule poo le o loo e faigaluega ai e toesea mai le totogi o mea nei mai lou totogi, e faigofie ai ona e pulea au tupe. E ao ona faamalamalama atu e le o loo e faigaluega ai le totogi e totogi ai oe, mea o loo i lou pepa totogi, ma tau atu nisi tupe o le a toesea ma ia maua ane iai sau maliega. E mafai ona toe aveesea mai lau maliega i soo se taimi ae ao lava ona e toe totogi ane le tupe.

Mo lou saogalemu, o toesega uma o le a faailoa i le Matagaluega o Leipa mo le siakiina.

Totogi mo femalagaa‘iga

O le o loo e faigaluega ai ma oe e vaelua i le totogi o le pasese mai lou atunuu o loo e aumau ai aga‘i i Niu Sila, e tai ‘afa ‘afa ai. Afai ua totogi e lë o loo e faigaluega ai lou pasese atoa, e tatau ona e toe totogi i ai le ‘afa o lou pasese e ala i le toese mai o lea vaegatupe mai lou totogi. E ono totogi lava e oe ia lou pasese o loo e faimalaga ai i se isi vaega i totonu lava o Niu Sila.

Tupe toese mo nofoaga e nonofo ai

E tatau ona saunia e lë o loo e faigaluega ai se nofoaga saogalemu ma talafeagai mo oe i se tau talafeagai foi i Niu Sila nei, ma e tatau ona siaki lea tulaga e le Matagaluega o Leipa. O le a o latou aveesea mai le tupe mo le nofoaga o le a e aumau ai pe e te totogi sa‘oina foi.

Eletise ma isi mea totogi o le soifuaga

E tatau ona e totogiina le eletise ma isi totogi e aofia ai i le nofoaga o loo e aumau ai. E ono manaomia foi lou totogiina o nisi o tau mo femalagaiga. E mafai ona toesea mai nei tupe mai lou totogi pe totogi sao foi e oe. O isi fale faigaluega e aofia ai lava le eletise i le tau o le nofoaga o loo aumau ai. Fesili i lë o loo e faigaluega ai poo ä tonu mea e aofia ai i le tau o le nofoaga o loo e aumau ai ao ä foi mea e totogi ese mai le tau o le fale o loo e aumau ai.

I le mäe‘a ai ona aveesea uma nei tupe, o le a totoe se tupe i lau tusitupe. E täua tele le mea o le a e faia i lenei tupe o totoe!

TUPE TEU & TUPE LAFO

Tupe Teu
Ina ia mafai ona faasaoina se vaega tupe tele e ao ona e malosi. E tele nisi mea e faaosoosoina ai oe e faaaogä ai tupe a o iai i Niu Sila!

E mafai ona fesoasoani atu le o loo e faigaluega ai i le faasaoina o au tupe e ala i le faaokometi ona tuu ese se vaega o lou totogi i se isi tusi tupe e ese mai, ae tuu ai se isi tupe e lava lelei ai lau faasoa i vaiaso taitasi auä mea e moomia. E tatau ona iai lau maliega tusitusia e faatinoina ai lenei gaioiga.

Tupe lafo i aiga
E iai se totogi e mafai ai ona e lafo tupe i aiga. E mafai ona fesoasoani ane le faletupe o loo fai ai lau tusitupe. E mafai foi ona e faaaogä isi faletupe ma pisinisi e lafo ai tupe i aiga. E taugata pe afai e lafo soo tupe i aiga auä e iai lava le vaega tupe e totogi i taimi uma e lafo ai. Talanoa i lë o loo e faigaluega ai i se auala sili e faafaigofie ai ona lafo tupe i lou aiga.

MEA E AO ONA MANATUA

Totogi & Tupe Toese: O lou totogi i le itula e ono foliga mai e telë peitai e tele nisi tupe e toesea mai ai, ma afai e te lë faaeteete i le faasaoina o lau tupe ma teu lelei, e ono lë maua se vaega tupe tele e te toe foi ma oe.

Poto Masani: O i latou faato‘ä faigaluega i Niu Sila atonu e lë tetele totogi e pei o i latou ia ua toe foi mai i le galuega ona ua lava lo latou poto masani i le faatinoga o le galuega. Sauni la e a‘oa‘o le tele o mea ma faamasani i le galuega.

Totogi vaega: E masani ona sili atu ona lelei totogi vaega nai lo totogi itula pe afai o oe o se tagata faigaluega e vave le gaioi ma lelei ona faatino le galuega. E lelei lena auä e latou te totogi mai oe e tusa ma le vave ma le lelei o lau galue. E tatau ona e talanoa i lou pule pe tatau ona totogi vaega oe pe totogi itula.

E malamalama lelei le malo o Niu Sila ma lou pule o loo e naunau e taunuu ma ausia le faamoemoe o lou galue ai i le atunuu. Ae e ia te oe lava le faitalia i le faaaogä lelei o le avanoa.

FAIÄ

MEA E TE FAIA MO LOU PULE

E tatau ona mafai ona e faataunuuina mea manaomia i lau konekarate sa sainia ma lou pule, e aofia ai:

• vavevave i le galuega
• vaai lelei le nofoaga o loo e aumau ai
• amio lelei.

E tatau foi ona e usitaia tulafono uma o lou aumau ai i Niu Sila. Afai e te solia le tulafono, e ono oo atu ia te oe leoleo a Niu Sila. Afai e faamälölö oe mai lau galuega, o le a lë mafai ona toe faataga oe e te nofo i Niu Sila.

E manaomia foi e le pule lou faataunuuina o le galuega na faasino atu ia te oe. E tatau ona e faigaluega pe a manaomia oe, e ono aofia ai lou faigaluega i le Sapati. O itula faigaluega o le a faamaoti atu i lau konekarate faigaluega. O le tele o lou faigaluega, o le tele foi lea o lau tupe maua.

E täua le galulue faatasi o se vaega, talanoa i lë o loo ta‘ita‘i i le tou vaega poo lou pule foi i mea e manaomia. O se manatu lelei lou faalogo ma vaai i le uluai taimi o lau galuega ina ia malamalama i le auala e faatino ai. E manaomia ni nai vaiaso e faamasani ai.

Talanoa ma lou pule i nisi o mea e mafai ona e faia i le taimi e te lë o faigaluega ai. E mafai ona latou avatu ia te oe nisi avanoa o mea e mafai ona e faia aemaise o ni mea fou e te aoao ai foi.

MEA E FAIA E LOU PULE MO OE

E ese mai le totogiina o oe e lou pule i galuega o loo e faia, e tatau foi ona ia vaai lelei i nisi o itu mo mea o loo e moomia, mo se faata‘ita‘iga:

• sailia o se nofoaga talafeagai mo oe
• saunia vaega e kukaina ai taumafa ma alala ai
• totogiina atu ia te oe o se totogi itula e le itiiti ifo ile totogi maualalo o galuega
• saunia itula faigaluega e te galue ai
• saunia o le taavale e auina atu ai oe i le galuega ma toe foi mai i le fale.

E tatau foi i lou pule ona fesoasoani atu i lou soifua faaletagata a o iai i Niu Sila. O le vaaia lelei o mea uma e te manaomia a o iai i le atunuu. E tatau ona fesoasoani atu lou pule i le sailia o ni auaunaga faalauaitele ma faalapotopotoga e mafai ona fesoasoani ia te oe i le itu tau le soifua mälölöina, faatauga, taaloga ma le auai ai i sauniga lotu.

O i latou uma e ana galuega nei faavaitaimi e tatau ona taliaina e le malo o Niu Sila, ina ia faamautuina lelei ai, o i latou ia e talafeagai tonu ona pulea galuega ma saunia tulaga talafeagai tau galuega, le aumau ai faapea le saogalemu, e moomia mo tagata faigaluega faavaitaimi (RSE workers).

E finagalo lou pule e te talanoa atu pe a iai se faafitauli. Aua e te matamuli e talanoa iai!

FO‘IAINA O FAAFITAULI

Afai e iai sou faafitauli, o le mea muamua e ao ina ia fai o lou talanoa lea i le ta‘ita‘i o le tou vaega poo lou pule foi. E mafai ona e faia lava e oe lea gaioiga poo lou talosaga foi i le ta‘ita‘i o le tou vaega ia faailoa atu lea faafitauli i le pule. O le tele o faafitauli e soalaupule ai lava ii.

Afai e lë o faamalieina ai oe i le tali mai a le pule i le mataupu, e tatau ona faafesootai loa se tagata asiasi mai le Matagaluega o Leipa. O i latou ia o sui o le malo e mafai ona o latou faamautuina poo ausia e pule o fale faigaluega tulaga manaomia mo le faafaigaluegaina o oe.

E mafai foi ona e faafesootai se iuni, o i latou ia e tulai mo aiä tatau a tagata faigaluega i Niu Sila.

E iai auala e faamautinoa ai le faafofogaina o lau mataupu ma e ao ona e talanoa i se tasi i se taimi vave.

Afai e tulai mai se faafitauli, faafesootai:

• Lou ta‘ita‘i poo le pule
• Le sui o le malo
• Tagata asiasi mai le Leipa i le 0800 20 90 20
• Lau Iuni pe afai o oe o se sui o le Iuni

E mafai foi ona e faafesootaia le ofisa i Niu Sila:

• Ofisa Faufautua mo Tagatänuu
• Vaega a le komiuniti
• Auaunaga e faia fua, mo mataupu tau tulafono
• Auaunaga e lagoalgoina le aumau i Niu Sila

O loo iai i le faaiuga o lenei pepa o faamatalaga, numera e te faafesootai mo se fesoasoani.

GALUEGA

MALIEGA

Atonu ua e mauaina se maliega tau galuega, o se vaega lea o le ofa mo se galuega ua tuu atu ia te oe. Masalo ua faamalamalama atu e lou pule poo sona sui ia te oe.

O soo se tagata faigaluega i Niu Sila e tatau ona iai sana maliega mo galuega. O se pepa taua tele lea e faamalamalama ai galuega e tatau ona e faia mo lou pule ae o le ä foi e tatau ona faatino e le pule mo oe.

O le maliega lea o le a faataoto ai aiaiga eseese o loo faatulafonoina i Niu Sila. E aofia ai livi, totogi mo aso mälölö, faigaluega i aso mälölö ma livi mo aso ma‘i.

MANU‘AGA I LUGA O GALUEGA

Afai e iai se aafiaga o oe i se faalavelave, e tatau ona e talosaga tauala atu i lau foma‘i mo se fesoasoani mai le Faalapotopotoga o Taui o Faalavelave Faafuasei (ACC). E tatau ona totogi le pili a le ACC i lau lafoga. O le Faalapotopotoga o Taui o Faalavelave Faafuasei e na te fesoasoani i ni manu‘aga o se tagata aemaise o le fesoasoani lea i le totogiina o togafitiga faafoma‘i e faia pe a mäe‘a se faalavelave.

E aofia ai vailaau ma fualaau, ta‘otoga faapitoa ma togafitiga ae lë aofia ai faafitauli masani e pei o le fulü.

GASEGASE E LË AAFIA AI LE GALUEGA

E lë totogia e le ACC gasegase. O Inisiua mo le soifua mälölöina, e totogi ai soo se tau o ni mea e fesoota‘i atu i se gasegase, e te aafia ai a o e iai i Niu Sila.

O le inisiua lea o loo avanoa pe a totogi. E mafai ona aofia ai tupe faaalu mo le aga‘i atu e vaai le fomai, talavai, togafitiga faavavevave mo oloa pe o le taofia foi i le maota gasegase, ta‘otoga ma togafitiga pe a toe faafoi oe i lou atunuu.

E mafai ona e talanoa i lou pule e fesoasoani atu e faatulaga sau inisiua mo le soifua mälölö ina ia totogi ai soo se togafitiga e faia pe a aafia i gasegase.

LOU PEMITA FAIGALUEGA

E lë mafai ona e talosaga mo se isi lava pemita mai le ofisa o femalagaaiga a o e iai i Niu Sila. Afai ua e fia alu ese mai lou pule, e lë toe faatagaina oe ona e nofo i Niu Sila. Atonu e mafai ona e see atu e faigaluega i se isi galuega faavaitaimi ae e tatau lava ona malilie i ai le Matagaluega o Leipa a o lei faia lea gaioiga.

E tatau ona e toe foi i lou aiga i le mäe‘a ai o lau galuega. Afai e te lë usitaia lea tulaga i lou pemita faigaluega, e ono faasäina ai ona e toe foi mai i Niu Sila.

Afai e te usitaia tuutuuga o lou pemita ma toe maua se isi galuega i se isi pule o galuega faavaitaimi, e mafai ona e toe foi mai i NIu Sila. E tatau ona e toe talosaga ona e mäe‘a le aogä o lou pemita i le taimi e te tuua ai Niu Sila.

IUNI

O iuni latou te suia tagata faigaluega. E mafai ona e auai atu i se iuni i Niu Sila ae iai le totogi. O le avea ai o oe ma se sui o le iuni, o le a mafai ai e oe o se tagata faigaluega ona faaleoina ou lagona i soo se mataupu i totonu o le siosiomaga o loo e galue ai, e mafai foi ona maua se lagolagosua mo oe pe a iai se feeseeseaiga i le galuega. O nisi iuni e iai sui mai Pasefika o loo iai e ono malamalama i lau gagana.

TULAGA O LE SOIFUAGA

TAU

Ia e tapenapena lelei mo le tau. O Niu Sila e mälülü atu le tau nai lo le tau ua e masani ai ma e te ono faigaluega i se siosiomaga mälülü.

Sauni e laei ofu talafeagai ma seevae, faaaogä ie ufi moega mafanafana mo lou moega ma faamälü i le vai mafanafana. O le auala sili e faamafanafana ai oe i le po o le faatele lea o ni palanikeke. O le a tuuina atu ia te oe ni masini faamafanafana ma o le a faasino atu e lou pule le faaaogäina.

Tusa lava pe oo i le tau mafanafana mai ia Tesema ia Aperila, ae lë tutusa lava le vevela o Niu Sila ma le Pasefika. O masina mälülü o Iulai, Aukuso ma Setema.

E ao i lou pule ona faamalamalama lelei atu ia te oe mea uma e te manaomia pe afai e te malaga mai i le tau mälülü. E ta‘u atu foi ia te oe le ituaiga tau o loo iai le atunuu i lea taimi.

NOFOAGA E NOFO AI

E mafai ona e siaki ane i lou pule poo se sui foi o le RSE mo le ituaiga nofoaga o le a e aumau ai, ao ä foi ni mea ua saunia mo le nofoaga o le a e aumau ai. E malamalama lelei lë o loo e faigaluega ai e lë mafai ona e aumaia ni mea lapopoa pe a e malaga mai, o le ala lea e saunia ai e latou mea manaomia mo ou tofaga ma e tatau ona e faaaogäina. E iai lava nai mea e mafai ona e aumaia e oe mai lou aiga e faamanaia atili ai lou fale.

O mea uma e moomia mo le kukaina o taumafa, o masini ta lavalava ma le vai vevela ua avanoa uma mo lou faaaogäina. Faaaogä lelei mea ia ua sauia mo oe ma ia mautinoa o loo sao lona faaaogaina.

O lau matafaioi le vaaia lelei o le nofoaga o le a e aumau ai e ala lea i le faamamä lelei ona teu. O ni mea e faaleagaina e ono totogiina e oe ma e ono taugata foi.

TAUMAFA

E tatau ona e totogiina au meataumafa. O Niu Sila e tele ma anoanoai taumafa eseese e te faatauina mai faleoloa.

Taumafai e taumafa lelei ma paleni. E tolu aiga o le aso e tatau ona fafaga ai lou malosi mo le galuega. E ono mana‘omia foi lou taumafa i mea‘ai mamafa e fua i le tulaga o le tau ma le ituaiga galuega o loo faia i aso taitasi e moomia tele ai le malosi. Taumafai e aua ne‘i taumafa mämä pe faamisi foi sau tausamiga, ma toaga foi e taumafa le vai.

Atonu ua mäe‘a ona faatulaga e lou pule le itu tau le taumafataga. E tofu lava le fale faigaluega ma auala eseese o le faatulagaina o taumafa mo tagata faigaluega. Afai o loo iai se itu e lë o faamalieina ai i tulaga tau le taumafa, faamolemole talanoa i lou pule.

SOIFUA MÄLÖLÖINA

E ono faigata le tau ma le tulaga o galuega i Niu Sila nei mo lou soifua mälölöina, o le ala lea e fautuaina ai le faamafanafana ma faamamä le siosiomaga o loo e aumau ai i aso uma. E mana‘omia le faamälü i aso uma ma laei ofu mamä i aso uma.

E matuä täua lava le faamamä ese o le palapala i aso taitasi ona e ono aafia ai lou tino i le siama. Faaaogä fasimoli poo vailaau e faamamä ai lou tino aemaise lava o ni ma‘i sua e ono afaina ai. Fesili i lou pule mo se fesoasoani i le sailia o vailaau ia mo oe.

O le faatumauina o le mamä o lou tino o le a fesoasoani foi i le faamamao ese o ni gasegase mai ia te oe.

E iai foi le isi ituaiga soifua mälölöina e taua - o lou mafaufau. O le a matuä e misia lou aiga. O lou fesootai pea ia i latou ma le lafoina o tupe i ai o se tasi lea o auala e fesootai ai.

Tumau i le faamalosi ma manatua e vave tele le alu a le taimi. Faaaogä le taimi lea e pasi e taga‘i toto‘a ai i le galuega na e malaga mai e fai ma ia galue malosi.

Afai o loo e faalogoina le lë lavä ma le lë lava o le mälölö e tatau ona e talanoa i lou ta‘ita‘i poo lou pule foi poo le sui o le malo.

FOI I AIGA

O le a e tuua Niu Sila i le taimi e mäe‘a ai lau galuega faavaitaimi. Afai ua faatauina ni oloa e ave i lou aiga i luga o le vaalele, manatua e toe totogi le tupe pe a ova atu le mamafa faatulagaina o oloa e ave i luga o vaalele.

Taumafai e fuafua e lafo muamua au oloa i lou aiga ae e te le‘i malaga. Talanoa foi i lou pule mo se fesoasoani aemaise o se tau taugofie e faatino ai ia fuafuaga. O le tupe e te faasao mai le totogiina o le tau o le feavea‘iina o oloa, o se tupe faasili foi lena i lau taga.

Manatua teu lelei le numera o lau IRD (lafoga) ma le numera o lau tusitupe Niu Sila. E te ono mana‘omia mea ia pe a e toe foi mai i Niu Sila i nisi galuega faapea i le lumanai. Afai e te finagalo e tatala pea lau tusitupe lea i Niu Sila e tatau ona lava se tupe e tuu i ai e taofi ai le tusitupe ma totogi ai pili a le faletupe. E ao foi ona e taofi mau i nisi o lavalava mafanafana e te faatauina a o iai i Niu Sila.

Ina ia faamalieina atoatoa oe i lau galuega faavaitaimi atoa ma nisi o faamanuiaga e ono maua, e ao ona e talanoa i le sui o le malo e faatatau i nisi o avanoa faapea i le lumanai aemaise o ni tulaga tau tupe e mafai ona faamanuiaina ai.

NUMERA MO FESOOTA‘IGA

Tagata Asiasi a le Leipa 0800 20 90 20

Vaega a le RSE i le Matagaluega o Leipa (Ofisa o Femalagaaiga a Niu Sila) 0508 55 88 55

Laina mo le Soifua Mälölöina 0800 611 116

Ofisa e Lagolagoina le Aumau i Niu Sila 0800 776 948

Ofisa Faufautua mo Tagatänuu 0800 367 222

Pulega o Iuni o Fefaatauaiga a Niu Sila 0800 698 646

Faalavelave Faafuasei, Leoleo, Tineimu, Falemai 111

LISI O MEA E SIAKI MO LE MALAGA

O le a tuuina atu ia te oe ni pepa e moomia mo lou ulufale i Niu Sila ma le galuega. E tatau ona e teuina lelei nei pepa o faamaumauga täua ma malaga atu ma oe.

Mea Moomia

1. Tusifolau ua iai le Visa Niu Sila
2. Pepa malaga mo le vaalele
3. Maliega mo le galuega
4. Pepa malaga ma le inisiua o le soifua (pe a talafeagai)
5. Laisene Avetaavale (pe a iai)
6. Tupe mo le taimi a o le‘i maua lou totogi muamua
7. Lisi o numera e faafesoota‘i ai lou aiga
8. Numera o le lafoga i Niu Sila (pe a iai)
9. Numera o le tusitupe i Niu Sila ma le pepa tala tupe i le masini (pe a iai)

Faamolemole faamautu o loo tutusa lelei lou suafa o i lau pepa malaga ma lou suafa i le tusifolau ae poo sa‘o foi ona sipela.